Skenkings vir brei-,
hekel- en naaldwerk
Vlytige hande
Handelinge 9:36-42
 'n Persoon wat betrokke is by projekte
onder minderbevoorregtes, haweloses en senior burgers, wat verstote en
afgeskeep is, het u hulp en skenkings baie nodig.
Die projek bestaan oa uit 'n brei-,
hekel-, en naaldwerkprojek, sodat bogenoemde mense van iets warms, of
selfs 'n kledingstuk of kombersie voorsien kan word. Hierdie belangrike
taak se suksesvolle ontwikkeling en uitbreiding is baie afhanklik van
skenkings en weldoeners se guns, hulp en bydraes.
Opheffingswerk, waar opleiding in brei-,
hekel- en naaldwerk aangebied word, is deel van die projek, sodat mense
wat bg vaardighede baasraak, sodoende vir hulleself 'n inkomste kan
skep.
Skenkings van enige van die volgende
artikels sal gevolglik geweldig op prys gestel word: wol, hekelgare,
brei- en hekelpenne, materiale, naaldwerkbenodighede soos garing, rek,
ritsluiters en knope wat in die pad is en nie gebruik word nie,
oortollige stukkies kant, skêre, patrone, naaldwerkhouers, naaldwerkmasjiene en
enige ander artikels wat by naald-, hekel- en breiwerk nuttig is, of
gebruik kan word.
'n Klein geskenkie kan soms 'n groot
verandering in 'n ander persoon se lewe maak.
Die projek word in die Pretoria-omgewing
aangebied. Vervoer is ongelukkig nie beskikbaar om skenkings te gaan
oplaai nie. Persone wat graag skenkings wil maak vir hierdie
verdienstelike saak en sodoende iets wil bydra tot ander se ontwikkeling
en welsyn, kan skakel of 'n navraag stuur.
 |
Tel: 072 523 5952 |
|
|
Handelinge 9:36-42
 En in Joppe was daar 'n sekere dissipelin
met die naam van Tabíta, wat, as dit vertaal word, beteken Dorkas. Sy
was oorvloedig in goeie werke en aalmoese wat sy gedoen het. En in dié
dae het sy siek geword en gesterwe, en hulle het haar gewas en in 'n
bovertrek neergelê. En omdat Lidda naby Joppe was en die dissipels
gehoor het dat Petrus daar was, het hulle twee manne na hom gestuur wat
hom moes smeek dat hy sonder uitstel na hulle moet oorkom. En Petrus het
opgestaan en saam met hulle gegaan. En toe hy daar kom, bring hulle hom
in die bovertrek; en al die weduwees kom by hom staan en ween en wys hom
die onder— en bo-klere wat Dorkas alles gemaak het toe sy nog by hulle
was. En Petrus het almal buitentoe gestuur en neergekniel en gebid. En
hy het hom na die liggaam gedraai en gesê: Tabíta, staan op! En sy het
haar oë oopgemaak; en toe sy Petrus sien, het sy regop gesit. En hy gee
haar sy hand en laat haar opstaan. Daarop roep hy die heiliges en die
weduwees en stel haar lewendig voor hulle. En dit het bekend geword in
die hele Joppe, en baie het in die Here geglo. |
